Biba sin Droga i Violensia

Bestèl e bukinan ku bo ta deseá pa lesa basta dia kaba!  Obtenibel na tur libreria


Dikon mester papia di droga?

Bon mirá, dikon mester papia di droga na bo edat, miéntras ku ta masha poko biaha e por ta un problema pa bo?
Na bo edat, bo tin otro prekupashon: bo estudio, un amigu ku no ta dunabo atenshon, futbòl, bo mayornan ku ta skualbo pasó bo kamber ta un desaster i pasó bo no ta duna un man ku trabou di kas, etc.
Anto droga no ta kos di prekupá mashá kuné, ya ku e no ta un problema pa bo ni pa bo amigunan. Ku otro palabra, bo ta haña ta ko’i loko ku algun konosí mas bieu di bo ta toka e tema ei. Sinembargo, lo no dura muchu (na edat di diestres, dieskuater òf diesinku aña i tin biaha mas lat) ku un kantidat di hóben lo disidí di purba humamentu, alkohòl òf asta cheiba (mariwana, hashish). Anto mas despues tin hóben ku ta asta purba otro tipo di droga.


E kos akí no ta wega

Bo konosé kasonan semehante ku a sali den prensa?

Lysander tin diesun aña, e tin peso dimas. Ni un biaha so su kompañeronan di klas no a yam’é na su nòmber e aña akí. Nan ta yam’é ‘gordito’ òf  ‘hùlk’. E ta hopi tímido i den promé e tabata yora. Awor e ta sinta tur so den kurá di skol durante pousa. Aña pasá nan a kita su pañanan den tualèt, skonde nan. E ta bin skol, pasó e no ta riska bisa su tata kiko ta pasando. Un par di dia pasá, su dosente di gemnastik a grit’é den lès: "Ban mira, kore gordito! Bo tin ku deshasí dje barika ei! Lysander ta pensa ku tur loke ta pasando kuné ta su mes falta. Tin un dosente ku sa kiko e ta pasando aden, pero tòg nan no ta implementá niun medida na skol. Lysander ta hasi su máksimo esfuerso pa komplasé tur hende, pero e aktitut akí tin un efekto kontrali. E mester soportá mas sla, pushamentu i stotmentu ku èlebog. Bo ke sa kiko ta e último kos humiyante ku e mester a pasa aden? Awèl, ora el a bai habri su tas di skol den pousa, esaki tabata blo bashí.